Ózbekstan Respublikası Prezidenti Sh.M.Mirziyoyevtıń 2020-jıl 30-oktyabrdegi videoselektor jıynalısınıń 86-sanlı bayanatı 17-bántinde kórsetilgen Ózbekstan Respublikası Xalıq bilimlendiriw sistemasın 2030-jılǵa shekem rawajlandırıw koncepciyasınıń 8-bántinde belgilengen tapsırmalar orınlanıwın támiyinlew maqsetinde 2021-jıl 9-aprel kúni Nókis qalasındaǵı Prezident mektebinde Qaraqalpaqstan Respublikası xalıq bilimlendiriw ministrligi menen birgelikte ministrlikke qaraslı qánigelestirilgen mekteplerdiń hám PIIMA ǵa qaraslı I.Yusupov dóretiwshilik mektebiniń biologiya, inglis tili, matematika, informatika, ximiya, ana tili, tariyx páni muǵallimleri hám de Prezident mektebiniń jergilikli hám shet elli pedagoglar qatnasında 36 saatlıq tájiriybe almasıw oqıw-seminarına start berildi.
Oqıw-seminarı dawamında mektebimiz muǵallimleri tárepinen sheberlik sabaqları shólkemlestirildi.
• Ana tili hám ádebiyatı: Qatnasıqwshılarǵa ana tili hám ádebiyatı sabaqlarında oqıwshılardıń ómirlik kónlikpelerin rawajlandırıw usılları haqqında keń túsinikler berilip, alınǵan bilimler ámeliy shınıǵıwlar menen bekkemlendi hám mektep tájiriybesi menen bólisildi.
• Matematika: Qatnasıwshılar oqıtıw stili haqqında keń túsinikke iye bolıp, hárbir muǵallimniń sabaǵın baslamastan aldın eń dáslep oqıwshılardı fiziologiyalıq hám psixologiyalıq jaqtan tereń úyrenip shıǵıwınıń áhmiyeti haqqında maǵlıwmat aldı.
• Kompyuter tálimi: Bul sekciyada sabaqlardı qalayınsha qızıqlı ótiw múmkinligi boyınsha paydalı maǵlıwmatlar, kúndelikli sabaqlarda qollanılatuǵın metodlar hám qurallar, qayta baylanıs ornatıwdıń usılları haqqında keń túsinik aldı.
• Inglis tili: Oqıwshılardı sabaqqa qızıqtırıw usılları hám olardıń belsendiligin arttırıw jolları haqqında interaktiv metodlar, ámeliy shınıǵıwlar arqalı qatnasıwshılarǵa sheberlik sabaǵı ótkerildi.
• Biologiya: biologiya pánin kreativ oqıtıw boyınsha qatnasıwshılar keń túsinikke iye bolıp, tájiriybelerin arttırdı.
• Fizika: Fizika páninde texnologiyanı integraciyalastırıw arqalı qızıqlı sabaq shólkemlestiriw metodları haqqında maǵlıwmat berildi.
• Ximiya: Ximiya sabaǵında laboratoriyalıq jumıslarda zamanagóy texnologiyalardan paydalanıw usılları haqqında keń túsinikler berildi.
