Prezidenttiń "Prezident, dóretiwshilik hám qánigelestirilgen mektepler jumısın bunnan bılay da jetilistiriwge baylanıslı qosımsha ilajlar haqqında"ǵı pármanı qabıl etildi (PQ-5188-sanlı, 19.07.2021-jıl).
Prezident, dóretiwshilik hám qánigelestirilgen mekteplerdi rawajlandırıw agentligi Prezident bilimlendiriw mákemeleri agentligi etip qayta ataldı.
Párman menen Prezident bilimlendiriw mákemeleri agentligi janındaǵı Qábiletli jaslardı qollap-quwatlaw qorınıń Qáwenderlik keńesi quramı tastıyıqlandı. Qáwenderlik keńesiniń baslıǵı - Ózbekstan Respublikası Prezidenti.
Prezident bilimlendiriw mákemeleri agentligi janında Qábiletli jaslardı qollap-quwatlaw qorı shólkemlestirildi.
Prezident bilimlendiriw mákemeleri agentliginiń tiykarǵı wazıypaları hám baǵdarları tómendegilerden ibarat:
- oqıwshılar hám pedagog kadrlardıń STEAM pánleri boyınsha bilim hám kónlikpelerin xalıqaralıq (International Advanced Levels) baǵdarlamalar talaplarına muwapıq bahalaw, olarǵa xalıqaralıq dárejedegi AS hám A-LEVEL sertifikatların beriwdi ámeliyatqa engiziw;
- Agentlik sistemasındaǵı mekteplerdi A.Nawayı atındaǵı Milliy kitapxananıń elektron málimleme-kitapxana fondı hám jetekshi sırt el málimleme-kitapxana resursları fondlarına baylanıstırıw, oqıwshılar ushın usı fondlardan keńnen paydalanıw imkaniyatın jaratıw;
- Agentlik sistemasındaǵı mektep oqıwshılarına jetekshilik, sistemalı tallaw, kreativ hám sın kózqarastan pikirlew, sheshenlik, joybarlardı basqarıw kónlikpelerin úyretiw;
- Prezident mekteplerinde oqıwshılardı kásipke baǵdarlaw, oqıwdı dawam ettiriw ushın joqarı bilimlendiriw mákemelerin tańlawǵa járdemlesiwge qaratılǵan "Mektep keńesgóyi" (School Councilor) baǵdarlamasın engiziw;
- qánigelestirilgen mekteplerde maman qánigeler, mentorlar (ustazlar), ekspertler hám málimleme texnologiyaları tarawında jumıs alıp baratuǵın shólkemlerdi tartqan halda ayrıqsha bilimlendiriwge mútájligi bolǵan balalar ushın inklyuziv IT-bilimlendiriw agentligi sistemasın engiziw;
- dóretiwshilik mekteplerinde oqıwshılardıń sırt el ádebiyatların ózbek tiline awdarıw kónlikpelerin qáliplestiriw maqsetinde Agentliktiń "Jas awdarmashılar dógeregi" sistemasın shólkemlestiriw;
- Agentlik sistemasındaǵı dóretiwshilik mekteplerinde veb-dizayn, kompyuter grafikası, súwretlew hám sanlı kórkem óner, audiovizual shıǵarmalardı jaratıw hám qayta islew, sonday-aq, aktyorlıq sheberligi sıyaqlı baǵdarlarǵa qánigelestirilgen dógereklerdi ashıw.
