«Интилмаган одам шунчаки қуруқ қолади» (Video)

«Интилмаган одам шунчаки қуруқ қолади» — 27та университетга қабул қилинган мактаб ўқувчиси ҳикояси

«Оптимист» рукнининг навбатдаги қаҳрамони Темурбек Сулаймонов – Тошкент шаҳридаги президент мактабининг 11-синф ўқувчиси. У мактабни тугатиш арафасида, абитуриентлик босқичига ўтиб улгурмай, ҳозирданоқ 27та хориж университетида ўқиш ҳуқуқини қўлга киритган.

Темурбек ўз мақсадларига қандай эришаётгани ва яна нималарни мақсад қилгани ҳақида сўзлаб берди.

Эҳтимол, унинг сўзлари президент мактабларида ўқиш орзусида бўлганлар ёки хориж университетларига грант ютишни мақсад қилганларга мотивация берар.



 

«Оддий одамларнинрг болалари бундай мактабда ўқий олмаса керак, деб ўйлардим»

— Президент мактабига киришдан олдин мен ҳам 9 йил оддий мактабда ўқиганман. Дастлаб, бу мактабга кира олишимга унчалик ишонмаганман. Сабаби ҳужжат топшириш учун талаблар жуда юқори эди, қолаверса, имтиҳон топшириш учун Тошкент шаҳридаги энг иқтидорли ўқувчилар бир жойга йиғилган. Шунинг учун ўз имкониятимни пастроқ баҳолаганман.

Ундан олдинроқ мактаб очилиши ҳақидаги хабарларни интернетда ўқиганимда: «Зўр мактаб бўлса керак, болалар маза қилиб ўқишса керак», деб ўйлаганман. Менда ҳам оддий одамларнинг болалари бундай мактабларда ўқий олмаса керак деган фикр бор эди. Лекин қабул бошланганда нега мен ўзимни синаб кўрмаслигим керак, деган фикрга келганман ва ҳужжатларимни топширганман.

Имтиҳондаги шаффофликни кўриб фикрларим ўзгарган, бу мактаб танлаб олинган ўқувчилар учун эканини, молиявий келиб чиқишидан қатъи назар, иқтидорлилар ўқий олиши мумкинлигини тушунганман.

«Ҳеч нарса қилмай ўтирсам, имкониятдан қуруқ қолардим...»

— Мактабга қабул қилингач, бирданига кўчиб келмаганмиз. Бошида то мослашиб кетгунимизча уйдан қатнаганмиз. Бир куни мактабдан чиқиб автобус бекатига кетаётганимда бир аёл президент мактабидан чиққанимни кўриб, мактаб ҳақида қизиқди ва кутилмаганда сўради: «Бу мактабга кириш учун қанча пул бердинг?»

Бундан олдин ҳам президент мактабида ўқийдиганлар ҳақида ижтимоий тармоқларда турли салбий фикрларни ўқигандим. Шунинг учун мен у аёлга имтиҳон шаффоф ўтишини, агар талабларга жавоб берса, ҳамма бу мактабда ўқиши мумкинлигини тушунтиришга ҳаракат қилдим. У аёл: «Ҳа, тушунарли», деди, лекин кўзида ишонч кўрмадим.

Агар болаларнинг ўзларида ишонч бўлса, мактаб имтиҳонини топшириб кўришларини жуда хоҳлаган бўлардим. Ҳар доим ниманидир хоҳлайдиган бўлсак, ҳеч бўлмаганда ҳаракат қилиб кўришимиз керак. Агар мен ҳам ўшанда шубҳа қилиб ҳеч нарса қилмасдан ўтирганимда, президент мактабида ўқиш имконидан қуруқ қолган бўлардим.

«IELTS баллим – 7,5»

— Инглиз тилини анча олдин ўрганишни бошлаганман. Бошланғич даражадан бошлаб, 3 йил ичида «advanced» – мукаммал даражада ўрганиб олдим. Ҳозир IELTS имтиҳонидан даражам – 7,5 балл.

Инглиз тилини ўрганиш учун биринчи навбатда қизиқиш керак. Бусиз, менимча, тил ўрганиш қийин.

«Асосий фанлар инглиз тилида ўқитилади»

— Президент мактабида ўқувчилар душанбадан жума кунигача бўлишади. Дам олиш кунлари уйга қайтиш мумкин. Ҳар куни соат 15:30гача дарс, ундан кейин дам олиш, тўгаракларга қатнашиш, дарс қилиш мумкин.

Асосий фанлар: физика, математика, биология, кимё, информатика фанлари инглиз тилида ўтилади. 10-синфдан эса фанларни танлаш имкони берилади. Математикани ўқиш мажбурий, қолган 3та фандан 2тасини танлаб олиш мумкин.

«27та чет эл университетига қабул қилиндим»

— Инглиз тилини ўрганишни бошлаганимда бир кун келиб, албатта, IELTS имтиҳонини топшираман деб ният қилгандим. Мақсадимга эришдим. Инсон мақсад қўйиб унга интилаётган бир пайтда бошқа кутилмаган мақсадлар ҳам пайдо бўлади. Масалан, мен доим хорижда ўқишни чет эллик ўқитувчилардан дарс олишни хоҳлардим. Президент мактабида эса ҳали чет элга кетмасдан туриб хорижлик ўқитувчилардан дарс олиш имконига эга бўлдим.

Хориж университетларига ҳам ҳужжат топширдим. Ҳозиргача дунёнинг турли давлатларида жойлашган 27та ОТМда ўқиш имконини қўлга киритдим. Йўналишим – халқаро муносабатлар. Асосий университетлар АҚШ, Франция, Швейцария, Буюк Британияда жойлашган.

Танламоқчи бўлган университетларим АҚШда. Лекин ҳозирча бир қарорга келганим йўқ, сабаби яна қўшимча грантларга ҳужжат топширганман. Уларнинг жавоби чиқишини кутяпман. Бундан ташқари, танлаган йўналашимда қайси университетда таълим сифати юқори эканига қараб бир қарорга келаман.

«Хориж университетига ўқишга кириш учун...»

— Ҳужжат топшириш жараёнини ўтган йил бошлаганман. Ўзи одатда, хорижда ўқиш учун ҳужжат топширишни бир йил олдин бошлаш лозим. АҚШ ОТМларига ҳужжат топшириш учун умумий платформа – Commonapp орқали топшириш мумкин. Платформага ҳужжатлар юкланади ва сиз танлаган университетларга жўнатилади. Ҳужжатлар 2 хил бўлади: умумий ва сиз танлаган университет сўраши мумкин бўлган алоҳида ҳужжатлар.

Университетлар турли мавзуларда эсселар сўраши мумкин. Бундан ташқари, шаҳодатномадаги баҳолар ҳам муҳим. Ҳужжатлар октябрь ойида топширилса ҳам, охирида шаҳодатнома албатта юборилиши керак ва бу баҳоларга эътибор берилади.

«Мактабнинг маданият вазириман»

— Инсон учун ижтимоий фаоллик жуда муҳим деб ҳисоблайман. Шунинг учун президент мактабига киришимдан олдин ҳам турли лойиҳаларда волонтёр сифатида иштирок этганман, TED клубида қатнашганман.

Ҳозир эса мактабнинг маданият вазириман. Менинг вазифам ўқувчиларнинг вақтини мазмунли ўтказишларига ёрдам бериш. Хорижга ҳужжат топширишга ёрдам бериш учун алоҳида клуб ҳам очганман.

«Ўқишим тугагач, Ўзбекистонга қайтаман»

— Хорижга ўқишга бориб, тугатгач Ўзбекистонга қайтишни режа қилганман. Лекин биз ҳақимизда барибир қайтиб келмаса керак, деган гапни айтишади. Масалан, бир ўртоғим нефт йўналишини танлаган, у ҳам четда ўқиб келиб, Ўзбекистонда шу соҳани риқожлантиришга ҳисса қўшмоқчи. Менинг ҳам режаларим шундай.

Зилола Ғайбуллаева суҳбатлашди.
Тасвирчи ва монтаж устаси – Нуриддин Нурсаидов.